อปิ นุ โข เตสํ มโนปสาเทน กิญฺจิ สุขํ อาปชฺเชยฺยาติ ฯ อาม ภนฺเต อตฺถีติ ฯ
เตนหิ มหาราช สาโม สุวณฺโณ ติณฺณํ พลวนิตานํ เจโตปสรเทน นิพฺพตฺโต อิสินิมฺมิโต
เทวนิมฺมิโต ปุญฺญนิมฺมิโตติ เอวเมตํ มหาราช ธาเรหิ จตฺตาโร อิเม มหาราช เทวปุตฺตา
สกฺเกน เทวสนมินฺเทน อายาจิตา กุเล อุปฺปนฺนา กตเม จตฺตาโร สาโม สุวณฺโณ จ
กุสราชา จ มหาปนาโท จ เวสฺสนฺตโร ราชา จ อิเม จตฺตาโร โพธิสตฺตา อายาจนา
โหนฺตีติ ฯ สุนิทฺทิฏฺโฐ ภนฺเต นาคเสน ปญฺโห คพฺภาวกฺกนฺติ ตยา สุกถิตา คุมฺพํ
อรณํ กตํ อนฺธกาโร อาโลโก กโต ชฏา วิชฏิตา นิปฺปภา ปรปฺปวาทา เอวเมตํ ตถา
สมฺปฏิจฺฉามีติ ฯ

คพฺภาวกฺกนฺติปญฺโห ฉฏฺโฐ ฯ

ภนฺเต นาคเสน ภาสิตํปิ เหตํ ภควตา ปญฺเจวทานิ อานนฺท วสฺสสหสฺสานิ
สทฺธมฺโม ฐสฺสตีติ ปุน จ ปรินิพฺพานสมเย สุภทฺเทน ปริพฺพาชเกน ปุจฺฉิโต เอวํ ภควตา
ภณิตํ อิเม จ สุภทฺท ภิกฺขู สมฺมาปฏิปติตี วิหเรยฺยุํ อสุญฺโญ โลโก อรหนฺเตหิ อสฺสาติ
อเสสวจนเมตํ นิปฺปริยายวจนเมตํ ยทิ ภนฺเต ปญฺเจวทานิ อานนฺท วสฺสสหสฺสานิ สทฺธมฺโม
ฐสฺสตีติ ภควตา ภณิตํ เตนหิ อสุญฺโญ โลโก อรหนฺเตหิ อสฺสาติ ยํ วจนํ ตํ มิจฺฉา
ยทิ ตถาคเตน ภณิตํ อสุญฺโญ โลโก อรหนฺเตหิ อสฺสาติ เตนหิ ปรญฺเจวทานิ อานนฺท
วสฺสสหสฺสานิ สทฺธมฺโม ฐสฺสตีติ ยํปิ วจนํ ตํ มิจฺฉา อยํ อุภโตปิ โกฏิโก ปญฺโห
คหนโตปิ คหนตโร พลวฺตปิ พลวตโร คณฺฐิโตปิ คณฺฐิตโร เวธิโตปิ เวธิตโร โส
ตวานุปฺปตฺโต ตตฺถ ตฺวํ ญาณพลวิปฺผารํ ทสฺเสหิ มงฺกโร วิย สาครพฺภนฺตเร
คโตติ ฯ ภาสิตเมตํ มหาราช ภควตา ปญฺเจวทานิ อานนฺท วสฺสสหสฺสานิ สทฺธมฺโม
ฐสฺสตีติ ปรินิพฺพานสมเย จ สภุทฺทปริพฺพาชกสฺส ภณิตํ อิเม จ สุภทฺท ภิกฺขู
สมฺมาปฏิปตฺตี วิหเรยฺยุํ อสุญฺโญ โลโก อรหนฺเตหิ อสฺสาติ ตญฺจ ปน มหาราช ภควโต
วจนํ นานาอตฺถญฺเจว โหติ นานาพฺยญฺชนญฺจ อยํ สาสนปริจฺเฉโท อยํ ปฏิปตฺติปริทีปนา
อิติ ทูรํ วิวชฺชิตา เต อุโภ อญฺญมญฺญํ ฯ ยถา มหาราช คคณํ ปฐวิโต ทูรํ วิวชฺชิตํ
นิรยํ สคฺคโต กุสลํ อกุสลโต ทุกฺขํ สุขโต ทูรํ วิวชฺชิตํ เอวเมว โข มหาราช เต
อุโภปิ อญฺญมญฺญํ ทูรํ วิวชฺชิตา ฯ อปิจ มหาราช มา เต ปุจฺฉา โมฆา อสฺสุ
รสโต เต สํสนฺทยิตฺวา อหํ กถยิสฺสามิ ปญฺเยวทานิ อานนฺท วสฺสสหสฺสานิ สทฺธมฺโม
ฐสฺสตีติ ยํ ภควา อาห ขยํ ปริทีปยนฺโต ภควา อวเสสกํ ปริจฺฉินฺทิ วสฺสสหสฺสานิ

อานนฺท สทฺธมฺโม ติฏฺเฐยฺย สเจ ภิกฺขุนิโย น ปพฺพชิตา อสฺสุ ปญฺเจวทานิ อานนฺท
วสฺสสหสฺสานิ สทฺธมฺโม ฐสฺสตีติ อปิ นุ โข มหาราช ตถาคโต เอวํ วทนฺโต สทฺธมฺมสฺส
อนฺตรธานํ วา วเทติ อภิสมยํ วา ปฏิกฺโกสตีติ ฯ น หิ ภนฺเตติ ฯ นฏฺฐํ มหาราช
ภควา ปริกิตฺตยนฺโต เสสกํ ปริทีปยนฺโต ปริจฺฉินฺทิ ยถา มหาราช ปุริโส นฏฺฐายิโก
สาวเสสกํ คเหตฺวา ชนสฺส ปริทีเปยฺย เตฺตกํ นาม เม ภณฺฑํ นฏฺฐํ อิทํ
เสสกนฺติ ฯ เอวเมว โข มหาราช ภควา นฏฺฐสาสนํ ปริกิตฺตนฺโต เสสกํ มชฺเฌ
เทวมนุสฺสานํ กเถสิ ปญฺเจวทานิ อานนฺท วสฺสสหสฺสานิ สทฺธมฺโม ฐสฺสตีติ ยํ ปน
มหาราช ภควตา ภณิตํ ปญฺเจวทานิ อานนฺท วสฺสสหสฺสานิ สทฺธมฺโม ฐสฺสตีติ
สาสนปริจฺเฉโท เอโส ยมฺปน สุภทฺทสฺส ปริพฺพาชกสฺส ปรินิพฺพานสมเย สมเณ
ปริกิตฺตยนฺโต อาห อิเม จ สภทฺท ภิกฺขู สมฺมาปฏิปตฺตี วิหเรยฺยุํ อสุญฺโญ โลโก
อรหนฺเตหิ อสฺสาติ อฏิปตฺติปริทีปนา เอสา ตตฺถ ตฺวํ ปริทีปนญฺจ ปริจฺเฉทนญฺจ เอกรสํ
กโรสิ ยทิ เต ฉนฺโท เอกรสํ กตฺวา ทีปยิสฺสามิ สาธุกํ สุโณหิ มนสิกโรหิ
อวิจลมานโส ฯ ยถา มหาราช ตฬากํ ภเวยฺย นวสลิลสมฺปุณฺณํ สมํ สุทฺธํ สุมุขํ
อุตฺตริยมานํ ปริจฺฉินฺนํ ปริวฏุมกตํ อปริยาทินฺเนเยว ตสฺมึ ตฬาเก อุทกุปริ มหาเมโฆ
อปราปรํ อนุปวทฺนฺโต อภิวทฺธนฺโต อภิวสฺเสยฺย อปิ นุ โข มหาราช ตสฺมึ ตฬาเก
อุทกํ ปริกฺขยํ ปริยาทานํ คจฺเฉยฺยาติ ฯ น หิ ภนฺเตติ ฯ เกน มหาราช
การเณนาติ ฯ เทวสฺส ภนฺเต อนุปวทฺธวเสนาติ ฯ เอวเมว โข มหาราช ชินสาสนวรํ
สทฺธมฺมตฬากํ อาจารสีลคุณวตฺตปฏิปตฺติวิมลนวสลิลสมฺปุณฺณํ ฯ อุตฺตริยมานํ ภควตา
มคฺคภาวนํ กถิตํ ตตฺถ มหาราช โย อาจารสีลคุณวตฺตปฏิปตฺติเมฆวสฺสํ อปราปรํ
อนุวทฺธาเปยฺย อภิวสฺสาเปยฺย ฯ เอวมิทมฺปิ ชินสาสนมุตฺตมธมฺมตฬาโก จิรํ ทีฆมทฺธานํ
ติฏฺเฐยฺย อรหนฺเตหิ โลโก อสุญฺโญ ภเวยฺย ฯ อิมมตฺถํ ภควตา สนฺธาย ภาสิตํ อิเม
จ สุภทฺท ภิกฺขู สมฺมาปฏิปตฺตี วิหเรยฺยุํ อสุญฺโญ โลโก อรหนฺเตหิ อสฺสาติ ฯ ยถา
ปน มหาราช มหาอคฺคิกฺขนฺโธ ชลมาโน อปราปรํ สุกฺขติณกฏฺฐโคมยานิ ชนา วิปฺปกิเรยฺยุํ
อปิ นุ โข มหาราช โส มหาอคฺคิกฺขนฺโธ นิพฺพาเปยฺยาติ ฯ น หิ ภนฺเต ภิยฺโย
ภิยฺโย ภนฺเต โส อคฺคิกฺขนฺโธ ชเลยฺย ภิยฺโย ภิยฺโย ปภาเสยฺยาติ ฯ เอวเมว โข
มหาราช ทสสหสฺสมฺหิ โลกธาตุยา ชินสาสนวรํ อาจารสีลคุณวตฺตปฏิปตฺติยา ชลติ ปภาสติ
ยทิ ปน มหาราช ตทุตฺตรึ พุทฺธปุตฺตา ปญฺจหิ ปณิธายฺเคหิ สมนฺนาคตา สุทนฺตา
อปฺปมตฺตา ปทเหยฺยุํ ตีสุ สิกฺขาสุ ฉนฺทชาตา สิกฺเขยฺยุํ สิกฺเขยฺยญฺจ ธมฺมํ ปริปูเรยฺยุํ

จาริตญฺจ สีลสมฺปทํ ปริปูเรยฺยุํ เอวมิทํ สตฺถุ สาสนํ ภิยฺโย ภิยฺโย จิรํ ทีฆมทฺธานํ
ติฏฺเฐยฺย อสุญฺโญ โลโก อรหนฺเตหิ อสฺสาติ อิมมตฺถํ ภควตา สนฺธาย ภาสิตํ อิเม
จ สุภทฺท ภิกฺขู สมฺมา ปฏิปตฺตี วิหเรยฺยุํ อสุญฺโญ โลโก อรหนฺเตหิ อสฺสาติ ฯ
ยถา ปน มหาราช อาทาเส สินิทฺเธ สเม สุมชฺชิเต วิมเล สณฺหสุขุมเครุกจุณฺเณน
อปราปรํ สุมชฺชิเต อปิ นุ โข มหาราช ตสฺมึ อาทาเส มลกทฺทมรโชชลฺลํ
ชาเยยฺยาติ ฯ น หิ ภนฺเต อญฺญทตฺถุํ วิมลตรํเยว ภเวยฺยาติ ฯ เอวเมว โข มหาราช
ชินสาสนํ วรํ ปกตินิมฺมลพฺยปคตมลกิเลสรโชชลฺลสุสณฺหสุขุมมตฺเตน ยทิ เต พุทฺธปุตฺตา
อาจารสีลคุณวตฺตปฏิปตฺติสลฺเลขธุตงฺคคุเณน ชินสาสนํ วรํ สิกฺเขยฺยุํ เอวมิทํ ชินสาสนํ
วรํ จิรํ ทีฆมทฺธานํ ติฏฺเฐยฺย อสุญฺโญ โลโก อรหนฺเตหิ อวิวิตฺโต ภเวยฺย ปฏิปตฺติมูลํ
มหาราช สตฺถุสาสนํ ปฏิปตฺติสารกํ ปฏิปตฺติยา อนนฺตรหิตาย ติฏฺฐตีติ ฯ ภนฺเต นาคเสน
สทฺธมฺมอนฺตรธานํ ยํ ภณถ กตมนฺตํ สทฺธมฺมอนฺตรธานนฺติ ฯ ตีณิ มหาราช อนฺตรธานานิ
กตมานิ ตีณิ อธิคมอนฺตรธานํ ปฏิปตฺติอนฺตรธานํ ลิงฺคอนฺตรธานนฺติ ฯ อธิคมเน มหาราช
อนฺตรหิเต สุปฏิปนฺนสฺสาปิ ธมฺมาภิสมโย น โหติ ปฏิปตฺติยา อนฺตรหิตาย สิกฺขา
ปทปญฺญตฺติ อนฺตรธายติ ลิงฺคํเยว ติฏฺฐติ ลิงฺเค อนฺตรหิเต ปเวณิเฉโท โหติ อิมานิ
โข มหาราช ตีณิ อนฺตรธานีติ ฯ สุวิญฺญาปิโต ภนฺเต นาคเสน ปญฺโห คมฺภีโร อุตฺตานีกโต
คณฺฐิ ภินฺนา นฏฺฐา ปรปฺปวาทา ภคฺคา นิปฺปภา ตุวํ คณิวรอุสภมาสชฺชาติ ฯ

สทฺธมฺมนฺตรธานปญฺโห สตฺตโม ฯ

ภนฺเต นาคเสน สพฺพํ อกุสลํ ฌาปยิตฺวา สพฺพญฺญุตํ ปตฺโต อุทาหุ เสสกํ
อกุสลํ ฌาปยิตฺวา สพฺพญฺญุตํ ปตฺโตติ ฯ สพฺเพเต มหาราช อกุสเล ฌาปยิตฺวา ตถาคโต
สพฺพญฺญุตํ ปตฺโต นตฺถิ ภควโต เสสกํ อกุสลํ ฌาปยิตฺวา กิริยนฺติ ฯ กึ ปน ภนฺเต
ทุกฺขา เวทนา ตถาคตสฺส กาเย อุปฺปนฺนปุพฺพาติ ฯ อาม มหาราช ราชคเห ภควโต
ปาโท สขลิกาย ขโต เวฬุวคามเก โลหิตปกฺขนฺทิกาพาโธ อุปฺปนฺโน กาเย อภิปฺปสนฺเน
ภควโต ชีวเกน วิเรโก กโต วาตาพาเธ อุปฏฺฐาเนน เถเรน อุณฺโหทกํ ปริยิฏฺฐนฺติ ฯ
ยทิ ภนฺเต นาคเสน ตถาคโต สพฺพํ อกุสลํ ฌาปยิตฺวา สพฺพญฺญุตํ ปตฺโต เตนหิ
ภควโต สรีเร อาพาโธ อุปฺปนฺโนติ ยํ วจนํ ตํ มิจฺฉา ยทิ ภควโต สรีเร อาพาโธ
อุปฺปนฺโน เตนหิ ตถาคโต สพฺพํ อกุสลํ ฌาปยิตฺวา สพฺพญฺญุตํ ปตฺโตติ ยํ วจนํ ตํ
มิจฺฉา นตฺถิ ภนฺเต วินา กมฺเมน เวทยิตํ กมฺมเมว มูลํ กมฺเมเนว เวทยิตํ ฯ อยํ